Монгол сум

Монгол сум (найраглал)

Гүррагчаагийн Жаргал

Түмэн шаньюгаас залгамжилсан тавин хоёр шанью

Түрэн тэлсэн Хүннү Сүннүгийн эрхэмсэг оршихуй

Түмтийн задралаас үүдэлтэй салан тусгаарлал

Түүхэнд дуурсагдах ялалт, ялагдлын давалгаанд

                                          Монгол хүмүн сумтайгаа

Модун шанью “Газар бол улсын үндэс” хэмээн

Эх орныхоо газар нутгийг тамгалж

Монгол үндэстнийг үүсгэн жолоодохдоо

Их дуут сумаа онилсон

Өндөлзөх дайсанг өглөө бүр сануулах

Өвч бүрэн цэгцэрсэн сум

Өнгөрсөн өдгөө өсөлтийг бэлгэдэх

Өнө мөнхөд орших Монгол сум

Азиас Европруу даяаршлыг эхлүүлсэн

Атилла, Чингис хаадын нум сум

Аравт, зуут, мянгатын тогтолцооны 

Арвин их ухааны мэргэн онь

Монгол морины омголон  давхианд

Мойл хар байг  оносон сум

Мордоод буухдаа түүхээ тэмдэглэсэн

Монгол бичгийн үйлэн сум

Эрхийн мэргэний эрчит цагаан сум

Эрийн гурван наадмын хийморь сэргээсэн сум

Эрх дураар бэлчих зээрийг эндүүлсэн сум

Эвийг сургасан  Алангоо эхийн сум

Халуун хүйтэн цагт ч

Хүсэл тэмүүлэл оргилохдоо

Хөх толбот нумаа хөвчлөн

Хүйн сумаа тавьдаг.

Бадрах буурахдаа хэрсүүжин тэвчиж

Балмадын үед гараа чивчиртэл атгасан сум

Даяар монголыг ар, өврөөр нь хувааж

Дагаар оруулахад гацаагүй сум

Ан гөрөө, аян дайны олз омог дүүрэн

Аж төрөх  ёсон малчны ухаанаар солигдож

Харийн дайсантай мөчөөрхдөг үе улирч

Хөршлөн найрсахад дэнсэлсэн сум

Цагийн өнгөөр сумны үүрэг өөрчлөгдсөн ч

Цаглашгүй их хүсэл тэмүүллийг агуулсан

Цаазат төрийн сүр жавхаа,  Монгол

Цэргийн дайчин суман

Энхийн үедээ энгүй талдаа нүүдэллэн

Эвсэн айлсахад зохицсон сум

Эрсдэл үүссэн үед зуун тавин эрс эгнэн

Эрч хүчээ нэгтгэхэд бэлэн сум

Зууны тэртээ тусгаар тогтнолоо бататгаж

Зуун тавин өрхөөр тунхагласан сум

Засахуй ухаанаар тэгширсэн

Засаг захиргаа нутаг дэвсгэрийн нэгж

Буурал түүхийн ээдрээт нугачаанд 

Бүрэлдэн тогтсон Монгол сум

Бүтээл амжилтаа түгээн цоллуулах

Бүгд эвсэхийн үүтгэл аймгийн сум

Хан төрийн есөн билэгдэл сумаа

Хүндэтгэн дээдэл юу

Хүй элгэний аргамжаа сумаа

Хүмүүн бүр алдаршуул юу

            Эх орныхоо нутаг дэвсгэрийн төлөө

            Эрэмгий дайчин үйлсээ зориулсан

Эцэг өвгөдийнхөө гавьяат үйлсийг

Эрчлэн үргэлжлүүлнэм бид.

Монгол Улсын тусгаар тогтнолын 100 жилийн ойн өдөр 

2011 оны 12 дугаар сар 29-нд бичиж

Эрхэм оюут та бүхэндээ өргөв  өө!